ప్రశ్న - సమాదానం

సున్నం తెచ్చిమ్మని భర్త ఇలా అడిగాడు(ట).

తే.గీ. పర్వతశ్రేష్ఠపుత్రికా పతి విరోధి
యన్న పెండ్లాము నత్తను గన్నతండ్రి
పేర్మి మీరిన ముద్దుల పెద్దబిడ్డ
సున్న మించుక తేఁగదే సన్నుతాంగి.

వివరణ:
పర్వతశ్రేష్ఠపుత్రిక-పార్వతి. ఆమె పతి-శంకరుడు. అతని విరోధి-మన్మథుడు. మన్మథుని అన్న-బ్రహ్మ. బ్రహ్మ పెండ్లాము -సరస్వతి. ఆమె అత్త-లక్ష్మి. లక్ష్మిని కన్నతండ్రి-సముద్రుడు. అతని పెద్దబిడ్డ-పెద్దమ్మ(దరిద్ర దేవత).

“ఓ పెద్దమ్మా (దరిద్ర దేవతా)! సున్నం తే” అని అర్థం.

దానికి కొంటె భార్య  సమాదానం (ట)

కం. శతపత్రంబుల మిత్రుని
సుతుఁ జంపినవాని బావ సూనుని మామన్
సతతము దాల్చెడు నాతని
సుతు వాహన వైరి వైరి సున్నంబిదిగో.

వివరణ:
శత్రములు-తామర పూలు. వాటి మిత్రుడు-సూర్యుడు. అతని సుతుడు-కర్ణుడు. కర్ణుని చంపినవాడు-అర్జునుడు. అతని బావ-కృష్ణుడు. అతని సూనుడు-ప్రద్యుమ్నుడు(మ న్మథుడు). మన్మథుని మామ-చంద్రుడు. చంద్రుని తలదాల్చినవాడు-శివుడు. అతని సుతుడు-వినాయకుడు. వినాయకుని వాహనం-ఎలుక. దాని వైరి-పిల్లి. పిల్లికి వైరి-కుక్క.

“ఓ కుక్కా! ఇదిగో సున్నం” అని అర్థం.